હું ઉપેક્ષિત – પ્રવીણ ગઢવી 6

 in કવિતા, ગઝલ તથા સર્વ પદ્ય  tagged પ્રવીણ ગઢવી

ગામ છોડીને

શહેરમાં ચાલ્યો

ધર્મ છોડી

ચર્ચમાં આવ્યો

નામ બદલીને

કોર્ટમાં આવ્યો

જાત બદલીને

ઓફિસમાં આવ્યો

તોય,

તમે મને ઓળખી કાઢ્યો,

આંગળી ચીંધીને હસ્યા,

ઘૃણાથી થૂંક્યા

તમે તો જબરા ત્રિકાળજ્ઞાની

વેદપંડિત

શાસ્ત્ર પુરાણી

ગમે તેટલા ગામ બદલું

દેશ બદલું

રૂપ બદલું

નામ બદલું

તોય તમે ઓળખી કાઢો

મારા કપાળે દીધેલા તમે ડામ

 – પ્રવીણ ગઢવી

6 thoughts on “હું ઉપેક્ષિત – પ્રવીણ ગઢવી”