(સંકલિત શે’ર) તું બરફની મીણબત્તી – વિજય રાજ્યગુરુ 20


{ વિજયભાઈ રવિશંકર રાજ્યગુરુ સિહોરની મુની હાઈસ્કૂલમાં શિક્ષક તરીકે ફરજ બજાવે છે, પરંતુ તેથી સવિશેષ તો તેઓ એક કવિ, લેખક અને સારા રચનાકાર તરીકેનો કાર્યભાર ખૂબ ખંતથી અને નિષ્ઠાથી નિભાવી રહ્યા છે. તેમના પ્રકાશિત સંગ્રહો “ચાલ પલળીએ!” (૨૦૦૦), “તું બરફની મીણબત્તી” (૨૦૦૩), “અવઢવ” (૨૦૦૫) અને “રૂપેરી વાળ” (૨૦૦૫) તેમની સક્ષમતાઓનો પરિચય સુપેરે આપી જાય છે અને ત્રણેય પ્રકાશનો ખૂબ સુંદર રચનાઓનો ભંડાર છે. પુસ્તક પ્રાપ્ત કરવા માટેનું સરનામુ છે રવિ મંગલ પ્રકાશન, ૪૦, ગૌતમેશ્વર નગર, રાજકોટ રોડ, પુલ પાસે, સિહોર, જીલ્લો ભાવનગર, પીન ૩૬૪ ૨૪૦, ફોન ૦૨૪૮૬-૨૩૧૭૭૦.

“તું બરફની મીણબત્તી” એ શ્રી વિજયભાઈ રાજ્યગુરુની ગઝલોનો સુંદર સંગ્રહ છે. ૧૯૭૭ થી ૧૯૯૦ દરમ્યાન લખાયેલી આ ગઝલો અર્થસભર છે, મનહર છે, છંદબધ્ધ છે અને ભાવકો – ચાહકો દ્વારા ખૂબ પ્રશંશાપ્રાપ્ત છે. ૨૦૦૩ માં પ્રકાશિત આ ગઝલસંગ્રહની ગઝલોના કેટલાક સંકલિત શે’ર આજે પ્રસ્તુત છે. અક્ષરનાદને આ ગઝલસંગ્રહ ભેટ આપવા બદલ શ્રી વિજયભાઈ રાજ્યગુરૂનો ખૂબ ખૂબ આભાર. }

અમે કૈંક જન્મો વટાવીને આવ્યા,
તમે એક ઉંબર વટાવી શક્યાં નહિ !

**

ટેકરીની ટોચ માથે જેમ દેરી હોય છે,
એ રીતે મનના મથાળે તું જ બેઠી હોય છે.

**

મારી કથામાં કોઈ શીરી, હીર કે જુલિયટ નથી,
નહીતર અમે ફરહાદ, રાંઝા રોમિયોથી કમ નથી.

**

અમારા નસીબે તરસ તેં લખી છે અને રણ લખ્યાં,
વિધાતા તને ઝાંઝવાં પી જવાની સજા તો લખે.

**

તારા પ્રણયમાં છું એ ખબર ખાનગી ન’તી,
સૌને ખબર હતી તે તને ક્યાં ખબર હતી?

**

ખંડેર ચોતરફ છે ભવ્ય દ્રારિકા નથી,
મારી પ્રણયકથામાં કોઈ રાધિકા નથી.

**

વાદળીની કોર રૂપેરી બનાવે છે સૂરજ,
એ તને ચીંઘી શકું બસ એટલી ઓકાત છે.

**

પ્રથમ મો મરોડી મને અવગણે છે,
પછી ગળગળી થઈ ગઝલ ગણે ગણગણે છે !

**

તરસી થઈ એ આવશે એવા ખયાલથી,
હું વેદનાના બેઉ કાંઠે ખળખળ્યા કરું…

**

અરીસામાં નહિ મારી આંખોમાં જો,
તું છો એના કરતાં યે રૂપાળી છો.

**

આપ-લેની આપણે કેવી અજબ સમજણ કરી !
મેં હદયનો પ્યાર આપ્યો તેં મને નફરત ધરી

**

રાત આખી મેં કથા મારી કહી,
તેં કહ્યું વારતા સારી કહી!

**

કર્યો પ્રેમ તમને તો ગુનો ગણાયો,
તમે દિલ રહેંસીને છુટ્ટા ફરો છો.

**

કદાચિત ભૂલથી આવી જશો એવાં વિચારોમાં,
અમે ક્યારેય ઘરના બારણાં વાસી નથી શકતા.

અને આ આખાય ગઝલસંગ્રહમાં મને ખૂબ ગમી ગયેલા બે શે’ર….

સમંદરને ભીતરમાં રોકી શકાયા,
જરાં નૈન ભીનાં રહ્યાં – માફ કરજો.

**

દરદ આપનારાની યાદી કરું છું,
બધાં ટેરવે તું ગણાતી રહે છે…


20 thoughts on “(સંકલિત શે’ર) તું બરફની મીણબત્તી – વિજય રાજ્યગુરુ

Comments are closed.